Print this page
13 February 2014 Written by 

የአዲስ አበባ ፖሊስ ኮሚሽን ሁለት አባላት ተፈረደባቸው

    -በግብረ አበርነት በንፁኃን ላይ ድብደባ ፈጽመዋል ተብሏል

    ሕግን ማስከበር ሲገባቸው በመተላለፍ ገመቹ ረጋሳ በተባሉ ግለሰብ ላይ ድብደባ በማድረስና ሌሎች ሦስት ግለሰቦችን ያላግባብ እያንዳንዳቸው 600 ብር እንዲከፍሉ አድርገዋል የተባሉ፣ ሁለት የአዲስ አበባ ፖሊስ ኮሚሽን ባልደረቦች በእስራት እንዲቀጡ የካቲት 3 ቀን 2006 ዓ.ም. ውሳኔ ተላለፈባቸው፡፡

    የፌዴራል ዓቃቤ ሕግ ጥቅምት 6 ቀን 2006 ዓ.ም. የመሠረተውን ክስ ሲመረምር የቆየው የፌዴራል የመጀመሪያ ደረጃ ፍርድ ቤት የመናገሻ ምድብ ወንጀል ችሎት፣ የኮሚሽኑ አባል ናቸው የተባሉትን ረዳት ሳጅን አስቻለው እሸቱና ረዳት ሳጅን በኃይሉ ስሜ እያንዳንዳቸው በአንድ ዓመት ከስድስት ወራት እስራት እንዲቀጡ ውሳኔ አስተላልፏል፡፡

    ፍርድ ቤቱ ውሳኔውን ያስተላለፈው ዓቃቤ ሕግ ለመሠረተው የማይገባ የአሠራር ዘዴ መጠቀም ወንጀል፣ የሰውና የሰነድ ማስረጃዎችን አቅርቦ በማሰማት ነው፡፡ እንዲሁም ፍርደኞቹ ድርጊቱን በማመናቸው መሆኑን የቅጣት ውሳኔው ያስረዳል፡፡

    ሁለቱ የፖሊስ ባልደረቦች ድብደባውን የፈጸሙት ጳጉሜን 4 ቀን 2005 ዓ.ም. በግምት ከቀኑ 5፡00 ሰዓት ልዩ ቦታው ፓስተር አካባቢ መሆኑን የዓቃቤ ሕግ ክስ የሚያስረዳ ሲሆን፣ ‹‹ሁለት ግለሰቦች ስርቆት ተፈጽሞባቸዋል በሚል ሰበብ መሆኑንም ክሱ ይገልጻል፡፡ ሁለቱ ተሰርቀዋል የተባሉ ግለሰቦች ለፖሊሶቹ ሲያመለክቱ፣ ፖሊሶቹ የጥበቃ ሠራተኛ መሆናቸው የተገለጸው አቶ ገመቹ ረጋሳን ፓስተር አካባቢ ፖሊስ ጣቢያ በሚገኘው የሴቶች ማረፊያ ክፍል ውስጥ በማስገባትና መሬት ላይ በማስተኛት፣ በመጥረጊያ እንጨትና በጐማ ቀኝ እግራቸውን፣ ጭንቅላታቸውንና ትከሻቸውን ደጋግመው በመደብደብ፣ በቀኝ እግራቸው አውራ ጣት ላይ የመቀጥቀጥ ጉዳት ማድረሳቸውን ክሱ ያብራራል፡፡

    ተበዳይ የሚችሉት ቋንቋ ኦሮሚኛ መሆኑንና አማርኛ መናገር እንደማይችሉ እየነገሯቸው ‹‹ትችላለህ›› በማለት በማስገደድ ቃል መቀበላቸውን፣ ‹‹ስርቆቱን አልፈጸምኩም›› እያሉም በጀርባ አስተኝተው ድብደባ መፈጸማቸውንና ሲጮሁም አፋቸውን በፌስታል በመጠቅጠቅ ድርጊቱን መፈጸማቸውን የቅጣት ውሳኔው ያስረዳል፡፡

    በመሆኑም የፖሊስ አባላቱ ‹‹ሕግ አስከባሪ›› ሆነው ‹‹በሕግ ጥላ ሥር›› የያዙትን በማሰር፣ የማስገደድና የግርፋት ተግባር መፈጸማቸው በዓቃቤ ሕግ የሰውና የሰነድ ማስረጃዎች የተረጋገጠና ምንም እንኳን በግብረ አበርነት በንፁኃን ላይ የተፈጸመ ወንጀል ቢሆንም፣ የወንጀል ሪከርድ የሌለባቸው መሆኑን ከግምት ውስጥ በማስገባትና በቅጣት ማቅለያነት በመውሰድ፣ እያንዳንዳቸው በአንድ ዓመት ከስድስት ወራት እስራት እንዲቀጡ ውሳኔ በማስተላለፍ ማረሚያ ቤት እንዲያስፈጽም ትዕዛዝ በመስጠት መዝገቡን ዘግቷል፡፡

    Abyssinia Law | Making Law Accessible!

    Abyssinia Law is  a legal resource portal providing open access to primary and secondary legal materials for Ethiopia, such as laws, court decisions, articles, contact guidance and Lawyers Directory - with texts supplemented by online videos, a discussion forum and user blog. The service gives free access to Federal and State consolidated laws of Ethiopia (with status information whether the law is amended, repealed or effective)

    Website: www.facebook.com/ethiopianlaws