02 February 2014 Written by 

ከፍተኛ ኃላፊነት የነበራቸው ግለሰቦች በሙስና ወንጀል ክስ ተመሠረተባቸው

-ከዘውዲቱ ሆስፒታል ጋር በተገናኘ በ14.9 ሚሊዮን ብር ተጠርጥረዋል

የአዲስ አበባ ከተማ አስተዳደር የዲዛይንና ግንባታ አስተዳደር ቢሮ ምክትል ኃላፊን ጨምሮ፣ አምስት በተለያዩ ከፍተኛ ኃላፊነቶች ላይ የነበሩና ሁለት ግለሰቦች ከዘውዲቱ መታሰቢያ ሆስፒታል እድሳት ጋር በተገናኘ የሙስና ወንጀል ፈጽመዋል በሚል ተጠርጥረው ክስ ተመሠረተባቸው፡፡

የፌዴራል የሥነ ምግባርና የፀረ ሙስና ኮሚሽን ዓቃቤ ሕግ ከሆስፒታሉ ዕድሳት ጋር በተገናኘ ተገቢ ያልሆነ ጥቅም ለማግኘትና ለማስገኘት ወይም በሌላ መብትና ጥቅም ላይ ጉዳት ለማድረስ በማሰብ፣ የሙስና ወንጀል ፈጽመዋል በሚል ጠርጥሮ ክስ የመሠረተባቸው፣ አቶ ዮሴፍ ኃይለ ማርያም አርጋኖ የአስተዳደሩ የዲዛይንና ግንባታ አስተዳደር ልማት ቢሮ የግንባታ ንዑስ የሥራ ሒደት ባለቤት፣ አቶ ዮናስ አያሌው የዲዛይንና ግንባታ አስተዳደር ልማት ቢሮ ምክትል ቢሮ ኃላፊ፣ ሂሩት አያሌው የመሠረተ ልማት ግንባታ ባለሥልጣን የውል አስተዳደር ቲም ሠራተኛ፣ ገነት ጌታቸው የሆስፒታሉ ሕንፃ ዕድሳት ኮሚቴ አባል፣ አምባዬ አክሊሉ የኮንስትራክሽንና መሠረተ ልማት ቢሮ ሥራ አስኪያጅ፣ አቶ ግርማ በነበሩ የዲዛይንና ግንባታ አስተዳደር ልማት ቢሮ ተቆጣጣሪ መሀንዲስና የሆስፒታሉን ሕንፃ ለማደስ የተስማማው ተክለ ሃይማኖት አስገዶም ሕንፃ ተቋራጭ ባለቤት አቶ ተክለ ሃይማኖት አስገዶም ተድላ ናቸው፡፡

ተጠርጣሪዎቹ የተመሠረተባቸውን የሙስና ወንጀል ክስ እንዲመረምር ለፌዴራል ከፍተኛ ፍርድ ቤት አንደኛ ወንጀል ችሎት የቀረበለት ክስ እንደሚያስረዳው፣ ተጠርጣሪዎቹ የዘውዲቱ መታሰቢያ ሆስፒታል ሕንፃ ዕድሳት የዋና ጨረታ ኮሚቴ አባል፣ የቴክኒክ ኮሚቴ አባላት፣ ሥራ አስኪያጅና ተቋራጭ ነበሩ፡፡

ተጠርጣሪዎቹ ከ2000 ዓ.ም. ጀምሮ በእድሳት ላይ የነበረውን የዘውዲቱ መታሰቢያ ሆስፒታል ሕንፃን በተሰጣቸው የማጫረት ኃላፊነት፣ በመንግሥት ግዥ ሕግና ሥርዓት መሠረት የቴክኒክና የፋይናንስ ግምገማ ሳያደርጉ፣ የፋይናንስ ግምገማ ብቻ በማድረግ፣ ጉዳዩ በበላይ ኃላፊ ወይም በመጨረሻ ውሳኔ ሰጪ ተመርምሮ ውሳኔ መሰጠት ሲገባው፣ የቴክኒክ ግምገማ አለመደረጉ እየታወቀ ያላግባብ የተላለፈውን የጨረታ ኮሚቴ የውሳኔ ሐሳብ በማፅደቅ ኮንትራክተሩ እንዲያሸንፍ ማድረጋቸውን ያብራራል፡፡ 

በሆስፒታሉ ሕንፃ ላይ ከፍተኛ የሆኑ የዕድሳት ችግሮች እንዲከሰቱና ጥራታቸው ዝቅተኛ የሆኑ ዕቃዎችን ኮንትራክተሩ እንዲጠቀም በማድረጋቸው፣ በፈጸሙት በዋና ወንጀል አድራጊነትና በልዩ ወንጀል ተካፋይነት ሥልጣንን ያላግባብ መገልገል የሙስና ወንጀል መከሰሳቸውን ክሱ ይገልጻል፡፡ 

ኮንትራክተሩ ተገቢ የሆኑና ጥራታቸውን የጠበቁ ዕቃዎች እንዲገጠሙና ትክክለኛውን አሠራር የተከተለ ዕድሳት እንዲደረግ ተገቢ ክትትልና ቁጥጥር ማድረግ ሲገባቸው፣  የሕንፃው ዕድሳት በአግባቡ ሳይከናወን የክፍያ ምስክር ወረቀት በመስጠት፣ ሌሎች ያልተሠሩ የሲቪል፣ የኤሌክትሪክና የሳኒተሪ ሥራዎች እያሉና በውሉ መሠረት ተገቢውን የአሠራር ሥርዓት የተከተለ አሠራር ሳያከናውኑ 14,955,05 ብር ክፍያ እንደተፈጸመላቸው በማብራራት፣ ተጠርጣሪዎቹ በሙስና ወንጀል መከሰሳቸውን የክስ ቻርጁ ያብራራል፡፡ የኮሚሽኑ ዓቃቤ ሕግ ዘጠኝ የሰውና ዘጠኝ የሰነድ ማስረጃዎችን አቅርቦባቸዋል፡፡ 

Abyssinia Law | Making Law Accessible!

Abyssinia Law is  a legal resource portal providing open access to primary and secondary legal materials for Ethiopia, such as laws, court decisions, articles, contact guidance and Lawyers Directory - with texts supplemented by online videos, a discussion forum and user blog. The service gives free access to Federal and State consolidated laws of Ethiopia (with status information whether the law is amended, repealed or effective)

Website: www.facebook.com/ethiopianlaws