Print this page
31 January 2014 Written by 

ሐሰተኛ ሰነዶችን እያዘጋጀ ሲሸጥ የተደረሰበት ግለሰብ በ10 ዓመት ፅኑ እስራትና በገንዘብ ተቀጣ

    የጨርቆስ ክፍለከተማ አንደኛ ደረጃ ፍርድ ቤት መንግስታዊና መንግስታዊ ያልሆኑ ሐሰተኛ ሰነዶችን እያዘጋጀ ሲሸጥ ተደርሶበታል ባለው ግለሰብ ላይ የ10 ዓመት ፅኑ እስራትና የገንዘብ ቅጣት አስተላለፈ።

    በአዲስ አበባ ከተማ ልዩ ስሙ ደንበል ተብሎ ከሚጠራው አካባቢ ነዋሪ የሆነው ወንጀለኛ ጀማል አወል የሚባል ሲሆን ፥ ግለሰቡ ሐሰተኛ ሰነዶችን እያዘጋጀ እንደሚሸጥ ከህብረተሰቡ ህዳር 16 ቀን 2006 ዓም ለጨርቆስ ክፍለከተማ ፖሊስ መምሪያ ጥቆማ ይደርሳል።

    ጥቆማውን ተከትሎም ፖሊስ መምሪያው አስፈላጊውን የፍርድ ቤት ትዕዛዝ በማውጣት በግለሰቡ ቤት ባደረገው ፍተሻ ፤ ተጠርጣሪው በመኖሪያ ቤቱ ሐሰተኛ ሰነዶችን በማዘጋጀት ላይ እንዳለ እጅ ከፍንጅ ይያዛል በፖሊስ አባላቱ።

    በ50 የተለያዩ ግለሰቦች ስም የተዘጋጁና ከመንግስት መስሪያ ቤቶችና መንግስታዊ ካልሆኑ ድርጅቶች እንደተሰጡ የሚያረጋግጥ ማህተም የተመታባቸው ሐሰተኛ ሰነዶችም ይገኛሉ በግለሰቡ መኖሪያ ቤት።

    የንግድ ስራ ፈቃድ ሰርተፍኬት ፣ የዩኒቨርስቲ መግቢያ የሁለተኛ ደረጃ ማጠናቀቂያ የትምህርት ማስረጃ ፣ ከተለያዩ ቀበሌዎች የተሰጡ የልደትና የጋብቻ ማስረጃዎች ፣ የተለያዩ ደረጃ ያላቸው መንጃ ፈቃዶች ፣ የከተማ ልማት ቤቶችና ኮንስትራክሽን ሚኒስቴር የምዝገባ የምስክር ወረቀትና ሌሎችም ከተገኙት የሃሰት ማስረጃዎች መካከል የሚጠቀሱ ናቸው።

    ከዚህም አልፎ የመከላከያ ሚኒስቴር ፣ የውጭ ጉዳይ ሚኒስቴር ፣ የንግድ ሚኒስቴር ፣ የከተማ ልማት ቤቶችና ኮንስትራክሽን ሚኒስቴር ፣ የኢትዮጵያ መንገዶች ባለስልጣን ፣ የጥቁር አንበሳ ሆስፒታል ፣ ተመሳስለው  የተዘጋጁ ክብ ማህተሞች በግለሰቡ ቤት ተገኝተዋል።

    ኮምፒውተር ካሜራና ሌሎች የሐሰተኛ ሰነዶቹን የሚያዘጋጅባቸው ግብዓቶችም በግለሰቡ ቤት መገኘቱንም  ነው ፥ የክፍለ ከተማው ፖሊስ መምሪያ ወንጀል መርማሪ ሳጅን የኔነህ ለማ የገለፁት።

    በግለሰቡ ላይ የተመሰረተውን ክስ የተመለከተውና በመኖሪያ ቤቱ የተገኙትን የሰነድ ማስረጃዎች፣ ግብዓቶችና የሰው ምስክሮችን ያደመጠው  የጨርቆስ ክፍለከተማ አንደኛ ደረጃ ፍርድ ቤትም ፥ የመንግስትን ሰነዶችን በሃሰተኛ መንገድ በማዘጋጀትና በመሸጥ ወንጀል ግለሰቡን ጥፋተኛ በማለትበ10 ዓመት ፅኑ እስራትና በ4 ሺህ ብር እንዲቀጣ ወስኖበታል።

    Abyssinia Law | Making Law Accessible!

    Abyssinia Law is  a legal resource portal providing open access to primary and secondary legal materials for Ethiopia, such as laws, court decisions, articles, contact guidance and Lawyers Directory - with texts supplemented by online videos, a discussion forum and user blog. The service gives free access to Federal and State consolidated laws of Ethiopia (with status information whether the law is amended, repealed or effective)

    Website: www.facebook.com/ethiopianlaws