17 February 2016 Written by  FanaBC

ሀሰተኛ ሰነድ በማቅረብ የሌላቸውን የተቋራጭነት ደረጃ ያገኙ ከ500 በላይ የስራ ተቋራጮች ታገዱ

ሀሰተኛ ሰነድ በማቅረብ የሌላቸውን የተቋራጭነት ደረጃ ያገኙና ለፕሮጀክቶች መጓተት መንስኤ የሆኑ ከ500 በላይ የስራ ተቋራጮች ታገዱ።

የኮንስትራክሽን ሚኒስቴር ለፋና ብሮድካስቲንግ ኮርፖሬት እንዳስታወቀው፥ እነዚህ ተቋራጮች ከደረጃ 1 እስከ ደረጃ 4 ወስደው ሲሰሩ የነበሩ ናቸው።

በኮንስትራክሽን ሚኒስቴር የኮንስትራክሽን ኢንዱስትሪ ልማትና ሬጉላቶሪ ቢሮ በዚህ ዓመት በመላ ሀገሪቱ የሚገኙ እና በተለይም ከደረጃ 1 እስከ ደረጃ 4 ያሉ 1 ሺህ 622 ተቋራጮችን መረጃ አጣርቷል።

ከዚህ ውስጥ ከ500 በላይ የሚሆኑት ሃሰተኛ ሰነድ ተጠቅመው እየሰሩ ያሉ አካላት መሆናቸው ነው የተደረሰበት።

የቢሮው ሃላፊ ወይዘሮ ደስታ ሸዋሞላ፥ በማይመጥናቸው ደረጃ የተቀመጡ ወይንም ከአቅማቸው በላይ ደረጃን በተጭበረበረ ሰነድ ወስደው ሲሰሩ የተገኙት 122 የስራ ተቋራጮች መኖራቸውን ይናገራሉ።

እነዚህ ተቋራጮችም በሌላቸው ማሽነሪና የሰው ሃይል ያላቸው በማስመሰል በትልልቅ ፕሮጀክቶች ላይ የሚሳተፉ ናቸው።

49 የስራ ተቋራጮች ደግሞ ጭራሹኑ በሚኒስቴር መስሪያ ቤቱ ያልተመዘገቡ ነገር ግን ሃሰተኛ ሰነድ አዘጋጅተው የተሳተፉ ናቸው።

በአንድ ማሽነሪ ብቻ ተደጋጋሚ ምዝገባ ያደረጉ 10 የስራ ተቋራጮችም የማጣራቱ ግኝት ናቸው።

ሚኒስቴር መስሪያ ቤቱ ባደረገው በዚህ ፍተሻ ሊብሬያቸውን የተጠራጠራቸው 41 የስራ ተቋራጮችንም ያገኘ ሲሆን፥ ከዚህ ውስጥ የ19ኙ የስራ ተቋራጮች ሊብሬ ወደ ፖሊስ ተልኮ ተጨማሪ ፍተሻ እየተደረገበት ነው።

በተጨማሪም 254 ማሽነሪዎችና 61 ተሽከርካሪዎች አሉ ተብለው የቀረበባቸው ሰነድ እጅግ አጠራጣሪ ሆኖ ስላገኘው ህግ እንዲፈትሸው መደረጉንም ወይዘሮ ደስታ ተናግረዋል።

በ40/60 እና በ20/80 ቤቶች ግንባታ ላይ ሃሰተኛ ሰነድ በማቅረብ የተሰማሩ 29 ተቋራጮችም ታግደዋል።

በአሁኑ ጊዜም ጉዳያቸው በፌደራል ስነ ምግባርና ፀረ ሙስና ኮሚሽን፣ በፌደራል ፖሊስና  በሌሎች የፍትህ አካላት እየታየ ይገኛል ሲሉ ሃላፊዋ ተናግረዋል።

ሚኒስቴር መስሪያ ቤቱ ከክልል ቢሮዎችም እና ከአዲስ አበባ ከተማ አስተዳደር ጋር በጋራ ተቀናጅቶ አለመስራቱ እና በአደረጃጀቶች መካከል ወጥ የሆነ አሰራር አለመዘርጋቱ  ችግሩ እንዲባባስ አድርጎታል ብለዋል።

እነዚህን ችግሮች ለመቅረፍ ራሱን የቻለ የመረጃ ክትትል ቢሮ መዋቀሩንም አንስተዋል።

እነዚህን ስራዎች ከቴክኖሎጂ ጋር በማቀናጀት በቀጣይ ችግሩ እንዲቀረፍ እየሰራን ነው ያሉት ሃላፊዋ፥ በችግሩ እጃቸውን ያስገቡ ሰራተኞችም የህግ ተጠያቂነት የማይቀር እንደሆነም አስታውቀዋል።

Last modified on Wednesday, 17 February 2016 20:09