03 August 2015 Written by  FanaBC

በእነ አቡበክር አህመድ የክስ መዝገብ የተጠቀሱ 18 ተከሳሾች እስከ 22 አመት በሚደርስ ፅኑ እሥራት ተቀጡ

የፌደራሉ ከፍተኛ ፍርድ ቤት 4 የወንጀል ችሎት ሰሚት ምድብ በእነ አቡበክር አህመድ የክስ መዝገብ የተጠቀሱ 18 ተከሳሾችን ዛሬ 7 አመት እስከ 22 አመት በሚደርስ ፅኑ እስራት ቀጥቷቸዋል

22 አመት የተቀጡት ፍርድ ቤቱ በሽብር ወንጀሉ ከፍተኛ ሚና ነበራቸው ያላቸው አቡበክር አህመድ፣ አህመዲን ጀበል፣ ያሲን ኑሩ እና ከሚል ሸምሱ ናቸው

ችሎቱ በመዝገቡ የተጠቀሱ 5ኛ፣ 7ኛ፣ 8ኛ፣ 11 እና 15 ተከሳሾችን፤ በድሩ ሁሴን፣ ሳቢር ይርጉ፣ መሃመድ አባተ፣ አቡበክር አለሙ እና ሙኒር ሁሴንን እያንዳንዳቸውን 18 አመት ጽኑ እስራት ቀጥቷቸዋል

ሼህ መከተ ሙሄ፣ አህመድ ሙስጠፋ፣ ሼህ ሰኢድ አሊ፣ ሙባረክ አደም እና ካሊድ ኢብራሂም 15 አመት ጽኑ እስራት ተወስኖባቸዋል

እንዲሁም ሙራድ ሽኩር፣ ኑሩ ቱርኪ፣ ሼህ ባህሩ ዑመር እና የሱፍ ጌታቸውን 7 አመት ጽኑ እስራት ቀጥቷቸዋል

ተከሳሾችም ይሁን ከሳሽ ዓቃቤ ሕግ የቅጣት አስተያየት እንዲያቀርቡ 10 ቀን ጊዜ በችሎቱ ተሰጥቷቸው የነበረ ሲሆን፤ ዓቃቤ ሕግ ቀድሞ ማቅረቡን ችሎቱ አትቷል

ተከሳሾች የዓቃቤ ሕግን የቅጣት አስተያየት ካላየን አናቀርብም ማለታቸውን ተከትሎ ችሎቱ የዓቃቤ ሕግ የቅጣት አስተያየት እንዲደርሳቸው ትዕዛዝ አስተላልፎ ነበር

ይሁን እንጂ ከተሰጣቸው የመጀመሪያው 10 ቀን ሌላ ተጨማሪ ቀን ቢሰጣቸውም የቅጣት ማቅለያ ሊያቀርቡ አልቻሉም

ፍርድ ቤቱ ቅጣቱን ያስተላለፈው ዓቃቤ ሕግ ተከሳሾች ወንጀሉን የፈጸሙት በስምምነትና በአንድነት ነው የሚለውን የቅጣት ማክበጃ ተቀብሎ ነው

ችሎቱ ከእስራት ቅጣት በተጨማሪ ተከሳሾች ይህ ውሳኔ ከፀናበት እለት ጀምሮ ለአምስት አመታት እንዳይመርጡ፣ እናዳይመረጡ፣ በየትኛውም ቦታ ዋስም ምስክርም እንዳይሆኑ በአጠቃላይ ከማህበራዊ መብታቸው አግዷል