20 July 2015 Written by  FanaBC

በአዲስ አበባ በመንገድ ግንባታ ላይ የተሰማራ እስራኤላዊ ኩባንያ ባለቤትና ስራ አስኪያጅ በጉቦና በታክስ ስወራ ወንጀል ተጠርጥረው በቁጥጥር ስር ዋሉ

በአዲስ አበባ በተለያዩ አከባቢዎች በመንገድ ግንባታው ዘርፍ የተሰማራው የእስራኤሉ ትድሃር ኩባንያ ባለቤት እና ስራ አስኪያጅ ሚስተር ሚናሼ ሌሺ ጉቦ በመስጠት እና በታክስ ስወራ ወንጀል ተጠርጥረው በቁጥጥር ስር ዋሉ።

የፌደራል ስነምግባር እና ጸረ ሙስና ኮሚሽን አቃቤህግ ግለሰቡን ጠርጥሮ በቁጥጥር ስር እንዲውሉ ያስደረገው በኢትዮዽያ ገቢዎች እና ጉሙሩክ ባለስልጣን ለሚሰሩ 3 ኦዲተሮች 1 ነጥብ 5 ሚሊየን ብር ጉቦ ሰጥተዋል እና ከ140 ሚሊየን ብር በላይ ታክስ አጭበርብረዋል በሚሉ ሁለት ወንጀሎች ነው።

ኮሚሽኑ በግለሰቡ ላይ በቅርቡ ክስ እንደሚመሰርትም ለማወቅ ተችሏል።

ኩባንያው በአዲስ አበባ ከሌሎች ተቋራጮች ጋር ተጫርቶ ከአቡነ ዽጥሮስ- ፓስተር-ዊንጌት፣ ከ6 ኪሎ- ፈረንሳይ ጉራራ እና ከመገናኛ- ካፒታል ሆቴል ያሉ መንገዶችን በመገንባት ላይ ይገኛል።