03 April 2015 Written by  FanaBC

በታንዛኒያ በኮንቴይነር ታጭቀው ህይወታቸው ላለፈው 47 ኢትዮጵያውያን ተጠያቂ የነበረችው አስካለ ደዴሶ ተያዘች

በህገወጥ የሰዎች ዝውውር ወንጀል ተጠርጥራ ስትፈለግ የቆየችው አስካለ ደዴሶ ዴዴቦ በቅፅል ስሟ ቤቲ እና ተጠርጣሪ የወንጀል አጋሯ ሰሚራ ሀሰን ዓሊ በቁጥጥር ስር ዋሉ።

ተጠርጣሪዎቹ በፌደራል ፖሊስ እና በአለምአቀፉ የፖሊስ ሃይል/ ኢንተርፖል የጋራ ጥረት ተይዘው አዲስ አበባ ገብተዋል።

ግለሰቧ በቅርቡ በታንዛኒያ በአንድ ኮንቴይነር ውስጥ ታጭቀው ህይወታቸው ያለፈው 47 ኢትዮጵያውያንን ጨምሮ በ30 ሺህ የሚቆጠሩ ስደተኞችን በማዘዋወር ወንጀል የተጠረጠረች ነች።  

አስካለ ደዴሶ የተባለችው ግለሰብ የተለያዩ ስሞችን በመጠቀም ፣ ማንነቷን በመሰወር  በምስራቅ አፍሪካ ሲፈለጉ ከነበሩ የወንጀሉ ተጠርጣሪዎች በከፍተኛ ደረጃ ለአመታት ስትፈለግ የቆየች እና የወንጀል ሪከርድ ያያዘች እንደነበረች ነው  በፌደራል ፖሊስ ኮሚሽን የኢንተርፖል እና አለምአቀፍ የፖሊስ ትብብር ዳይሬክቶሬት ዳይሬክተር ኮማንደር ግርማይ ካህሳይ የተናገሩት።

ግለሰቧ የህገወጥ የሰዎች ዝውውርን በመምራት እና በማቀነባበር የምትታወቅ መሆኗንም ኮማንደሩ ጠቅሰዋል።

በመሆኑም አስካለ ደዴሶ በታንዛኒያ ህይወታቸው በአንድ ኮንቴይነር ውስጥ ታጭቀው ህይወታቸው ያለፈውን 47 ሰዎች ጨምሮ በወቅቱ ጉዳት ለደረሰባቸው 92 ሰዎች እንዲሁም በቁጥጥር ስር በዋለችበት ወቅት በህገወጥ መንገድ ለመዘዋወር በአንድ ክፍል ታጭቀው ለነበሩ 130 ያሀል ሰዎች ተጠያቂ ተደርጋለች።

በተጨማሪም እስካሁን 38 ሺህ ያህል ዜጎችን በህገወጥ መንገድ በማዘዋወር ለህልፈት፣ ለእንግልት እና ለተለያዩ አካላዊ እና ተያያዥ ጉዳቶች በመዳረግ ወንጀል ስትፈለግ ነበር።

የወንጀል አጋሯ ሰሚራ ሀሰን ዓሊ በበኩሏ ስደተኞችን ተቀብላ በማሸጋገር ወንጀል ነው ተጠያቂ የተደረገችው።

የሁለቱ ግለሰቦች መያዝም ህገወጥ የሰዎች ዝውውር ሂደትን ለመግታት የተደረሰ ትልቅ እርምጃ ተደርጎ እንደሚወስድ ኮማነደር ካህሳይ ገልፀዋል።

ኢትዮጵያ መሰል ወንጀሎችን ለመግታት ወደፊትም ከአለምአቀፉ የፖሊስ ሀይል ኢንተርፖል እና አጋር አካላት ጋር ተቀናጅቶ የተጠናከረ ክትትል እንደሚያደርግ ነው የጠቆሙት።