13 March 2015 Written by  FanaBC

በህገ ወጥ መንገድ ቤሩት በመላክ የሰው ህይወት እንዲጠፋ ያደረገው ግለሰብ በ8 ዓመት ፅኑ እስራትና በገንዘብ ተቀጣ

የማማለያ ቃላትን በመጠቀም ልጅሽን ወደ ውጭ እልካታለው በማለት ከ12 ሺህ ብር ተቀብሎ ልጅቷን በህገ ወጥ መንገድ ወደ ቤሩት በመላክ ህይወቷ እንዲጠፋ ያደረገው ግለሰብ በ8 ዓመት ፅኑ እስራትና በገንዘብ እንዲቀጣ ተወሰነ።

ተከሳሽ ቢኒያም ወርቁ ይሰኛል።

ኢትዮጵያውያን ዜጎችን ወደ ውጪ አገራተ የመላክ ህጋዊ ፈቃድ ሳይኖረው  ዜጎችን ወደውጪ አገራት በመላክ ወንጀል ነው አቃቤህግ ክስ የመሰረተበት።

በአማራ ክልል፣ ምስራቅ ጎጃመ ዞን ሸበላ ወረዳ መስከረም 2004 ዓ.ም በህጋዊ መንገድ ወደ ሳዑዲ ረቢያና ወደ ተለያዩ አገራት እልካችኋለሁ በማለት የተለያዩ ሰዎችን የማሳመን ስራ ለመስራት ይንቀሳቀሳል።

ወይዘሮ ስናፍቅሽ እያያው ወደተባሉ እማወራ ቤት በመዝለቅ ም ልጅሽን ለምን ወደውጪ አገር አልክልሽም በማለት ለማሳመን ሞክራል።

በተጨማሪም ልጅቷን በህጋዊ መንገድ እንደሚልካትበመንገር አዲስ አበባ በመሀድ ለምታከናውነው የጤና ምርመራ እና ለተለያዩ ሂደቶች ማስፈፀሚያ በሚል 12 ሺህ ብር ይቀበላል።

ተከሳሽ ልጅቷ ወደ አዲስ አበባ እንድትመጣ  የህክምና እና የአሻራ ምርመራ እንድታደርግ እና የፓስፖርት ቀጠሮ በማስያ ወደ መኖሪያዋ እንድትመለስ አድርጓልም ነው የሚለው የአቃቤህግ ክስ።

ተከሳሹ ግንቦት 2004 ዓ.ም ስልክ ወደ ልጅቷ ቤተሰቦች በመደወል ፣ ሂደቱ እንዳለቀ በመግለፅ ወደ አደስ አበባ እንድትመለስ እና የተነጋገሩበትን የገንዘብ መጠን ይዛ እንድትመጣ ይጠይቃል።
 
ግንቦት 30፣ 2004 ዓ.ም በአዲስ አበባ፣ አዲስ ከተማ ክፍለ ከተማ ልዩ ቦታው አውቶብስ ተራ አካባቢ ከቀኑ 9 ሰዓት ላይ ቀሪ 12 ሺህ ብሩን ከልጅቷ በመቀበል፥ ሰኔ 20፣ 2004 ዓ.ም ወደ ቤሩት ሀገር እንድትሄድ ያደርጋል።

በሄደች በስድስት ወሯ ህዳር 6 ቀን 2005 ዓ.ም ከ11ኛ ፎቅ ላይ ተወርውራ በመውደቅ በራስ ቅሏ ላይ በደረሰባት ስብራት ህይወቷ ሊያልፍ ችሏል።

አስክሬኗም ታህሳስ 6፣ 2005 ዓ.ም ወደ ትውልድ አገሯ ይገባለ።

አቃቤህግም በፈፀመው ህገወጥ በሆነ መንገድ ኢትዮጵያውያን ዜጎችን ወደውጪ አገር የመላክ ወንጀል ክስ መስርቶበታል።

ተከሳሽ የወንጀል ድርጊቱን አለመፈፀሙን ክዶ ቢከራከርም አቃቤህግ ያቀረበውን የሰው እና የሰነድ ማስረጃ ማስተባበል ባለመቻሉ ፍርድ ቤቱ ጥፋተኛ ብሎታል።

ተከሳሽ የቀደመ የወንጀል ሪከርድ የሌለበት እና ሊድን የማይችል ህመም ያለበት መሆኑን በቅጣት ማቅለያነት በመያዝ የፌዴራሉ ከፍተኛ ፍርድ ቤት ሶስተኛ ፍርድ ቤት በስምንት ዓመት ፅኑ እስራት እና በሁለት ሺህ ብር መቀጮ ቀጥቶታል።