20 January 2015 Written by  EthiopianReporter

ዓቃቤ ሕግ በቀድሞ የጋምቤላ ፕሬዚዳንት ላይ በድጋሚ ምስክሮቹን ሊያሰማ ነው

በአሁኑ ጊዜ የኖርዌይ ዜግነት ያላቸው ቀድሞ የጋምቤላ ፕሬዚዳንት የነበሩት አቶ ኦኮሎ አኳይ ላይ ተሰምተው የነበሩ የዓቃቤ ሕግ ምስክሮች ቃል ሳይቀረፅ በመቅረቱ፣ ከሳሽ የፌዴራል ዓቃቤ ሕግ በድጋሚ እንዲያሰማ ታዘዘ፡፡ 

ጉዳዩን እየመረመረው የሚገኘው የፌዴራል ከፍተኛ ፍርድ ቤት 19ኛ ወንጀል ችሎት የክስ መዝገቡን ለጥር 7 ቀን 2007 ዓ.ም. ቀጥሮ የነበረው፣ ከሳሽ ዓቃቤ ሕግ በአቶ ኦኬሎ፣ የደቡብ ሱዳን ዜግነት ባላቸው ዴቪድ ኡጁሉ ኡባንግ፣ ኡቻን ኦፒዬ፣ ኡማን ፕኬው ኡጁሉ፣ ኡጁሉ  ቻሞ ኡካይት፣ አተካ አዋር ኡጋላና ኡባግ ኡመድ ላይ ያሰማቸውን ምስክሮች ቃል መርምሮ ብይን ለመስጠት ነበር፡፡ ነገር ግን ፍርድ ቤቱ በዕለቱ እንደገለጸው፣ የዓቃቤ ሕግ አንደኛ ምስክር ቃል በከፊል፣ የሁለተኛ ምስክር ደግሞ ሙሉ በሙሉ ባለመቀረፁ ምክንያት ብይኑን መሥራት እንዳልቻለ አስታውቋል፡፡ በመሆኑም ዓቃቤ ሕግ እነዚህን ምስክሮች በድጋሚ አቅርቦ እንዲያሰማ አዟል፡፡ 

አቶ ኦኬሎ የፍርድ ቤቱን ትዕዛዝ ከሰሙ በኋላ ባቀረቡት አቤቱታ፣ ክስ ከተመሠረተባቸው ጊዜ አንስቶ መንግሥት በመደበላቸው ተከላካይ ጠበቃ ጉዳያቸውን ሲከታተሉ መቆየታቸውን አስታውሰው፣ ከዚህ በኋላ ግን የግል ጠበቃ ማቆም ስለሚፈልጉ ተከላካይ ጠበቃው በግል ለሚያቆሙት ጠበቃ የያዙትን ሰነድ እንዲያስረክቡላቸው አመልክተዋል፡፡

ፍርድ ቤቱም የአቶ ኦኬሎን ሐሳብ ተቀብሎ፣ የግል ጠበቃቸው ሲቀርቡ ተከላካይ ጠበቃው ሰነዱን እንደሚያስረክቧቸው አረጋግጦላቸዋል፡፡ በመጨረሻም ዓቃቤ ሕግ ያሰማው ድምፅ ለምን እንዳልተቀረፀ የፍርድ ቤቱ አስተዳደር ቀርቦ እንዲያስረዳ፣ ዓቃቤ ሕግ ምስክሮቹን በድጋሚ አቅርቦ እንዲያስመሰክርና ለአኝዋክ ተናጋሪ ተጠርጣሪዎች ፌዴራል ፖሊስ አስተርጓሚ እንዲያቀርብ አዟል፡፡ 

የኖርዌይ ዜጋ የሆኑት የ52 ዓመት ጎልማሳው አቶ ኦኬሎና ሌሎቹም ተጠርጣሪዎች የሽብር ቡድን ሊቀመንበር፣ የደኅንነት ኃላፊና በሌሎች ኃላፊነቶች ላይ በመሰማራት ባደረጉት የወንጀል አድማ ስምምነት፣ የጋምቤላ ሕዝቦች ነፃነት ንቅናቄ (ጋኅነን) እና የጋምቤላ ዲሞክራሲያዊ ንቅናቄ (ጋዴን) ተብለው በሚጠሩ የሽብር ቡድኖች ውስጥ ይሠሩ እንደነበር፣ የዓቃቤ ሕግ ክስ እንደሚያብራራ መዘገባችን ይታወሳል፡፡ አቶ ኦኬሎ በመጋቢት 2006 ዓ.ም. መጀመሪያ ሳምንት አካባቢ ደቡብ ሱዳን ውስጥ መያዛቸውም መዘገቡ አይዘነጋም፡፡