Print this page
05 January 2015 Written by  EthiopianReporter

ታዳጊዋን በቡድን በመድፈር ለሞት ዳርገዋል የተባሉት ተጠርጣሪዎች ክስ በዝግ እንዲታይ ተወሰነ

    ሃና ላላንጐ የተባለችውን የ16 ዓመት ታዳጊ ተማሪ አስገድደው በቡድን በመፈራረቅ ደፍረው ለሞት ዳርገዋታል ተብለው ታኅሳስ 7 ቀን 2007 ዓ.ም. ክስ የተመሠረተባቸው የአምስት ተጠርጣሪዎች፣

    ክሱ በዝግ እንዲታይ የፌዴራል ከፍተኛ ፍርድ ቤት ልደታ ምድብ ሦስተኛ ወንጀል ችሎት ታኅሳስ 24 ቀን 2007 ዓ.ም. ወሰነ፡፡ 

    የሟች ሃና እህቶች፣ ቤተሰቦችና ሌሎች ታዳሚዎች ታኅሳስ 24 ቀን 2007 ዓ.ም. ቀደም ብለው በችሎት ተገኝተው ነበር፡፡ ዘግየት ብሎ ሥራውን የጀመረው ችሎቱ፣ ተጠርጣሪዎቹን ማለትም ሳምሶን ስለሺ፣ በዛብህ ገብረ ማርያም፣ በቃሉ ገብረ መድኅን፣ ኤፍሬም አየለና ተመስገን ዘገዬን ጠርቶ ወደፊት እንዲቀርቡ ካደረገ በኋላ ለተጠርጣሪዎቹ፣ ለሟች ቤተሰብና እንዲሁም ክሱ በአግባቡ ለማስኬድ ችሎቱ በዝግ እንዲታይ ዳኞች ውሳኔ ላይ በመድረሳቸው፣ በዝግ የሚታይ መሆኑን በመገለጹ ሁሉም ታዳሚዎች ችሎቱን ለቀው ወጥተዋል፡፡ 

    ፍርድ ቤቱ ቀጠሮ ይዞ የነበረው ተጠርጣሪዎቹ ክሱን የሚቃወሙ ከሆነ፣ በተከላካይ ጠበቃቸው አማካይነት መቃወሚያቸውን እንዲያቀርቡ ወይም ድርጊቱን ስለመፈጸማቸውና አለመፈጸማቸው የእምነት ክህደት ቃላቸውን ለመቀበል ነበር፡፡ በዕለቱ የነበረውን የክርክር ሒደት ማወቅ ባይቻልም፣ ፍርድ ቤቱ የዓቃቤ ሕግ ምስክሮችን ለማድመጥ ቀጠሮ መስጠቱ ተሰምቷል፡፡ 

    ዓቃቤ ሕግ ታኅሳስ 7 ቀን 2007 ዓ.ም. ያቀረበውን የመጀመሪያ ክስ ታኅሳስ 17 ቀን 2007 ዓ.ም. አሻሽሎ በማቅረብ፣ በፊት ባቀረበው ክስ ተጠርጣሪዎች ጥፋተኛ ሆነው ከተገኙ፣ ከሦስት እስከ 15 ዓመታት ጽኑ እስራት ቅጣት ሊጣልባቸው እንደሚችል የሚደነግገውን የወንጀል ሕግ ቁጥር፣ ወደ ዕድሜ ልክ በሚያስቀጣ የወንጀል ሕግ ቁጥር በመቀየር ማሻሻሉን መዘገባችን ይታወሳል፡፡