Print this page
02 January 2015 Written by  FanaBC

ፍርድ ቤቱ በሃና ላላንጎ የክስ መዝገብ ላይ የአቃቤ ህግን ምስክር ለመስማት ቀጠሮ ያዘ

    የፌደራሉ ከፍተኛ ፍርድ ቤት 3ኛ የወንጀል ችሎት የ16 ዓመቷ ሃና ላላንጎን አስገድደው ደፍረው ለህልፈተ ዳርገዋታል በሚል በተጠረጠሩ አምስት ተከሳሾች ላይ የአቃቤ ህግን ምስክር ለመስማት ቀጠሮ ያዘ።

    ፍርድ ቤቱ ክስ አሰምቶ መቃወሚያ ካለ ለመቀበል ነበር ቀጠሮ ይዞ የነበረው።

    የሟች ቤተሰብ፣ ዘመድ አዝማድና ሌሎች የተለያዩ የህብረተሰብ ክፍሎች ቀደም ብለው ነው ወደ ፍርድ ቤት የደረሱት።

    ችሎቱ ተከሳሾች ላይ የተመሰረተው ክስ ተጣርቶ ለወደፊት ጥፋተኛ ናቸው አይደለም የሚለው ውሳኔ እንደተጠበቀ ሆኖ፣ የተፈፀመው ወንጀል ከሞራልም ሆነ ከሀይማኖት አንፃር ህብረተሰቡ ላይ አሉታዊ ተፅዕኖ የሚያሳድር ነው ብሏል።

    ይህ በመሆኑ እንዲህ አይነት ነገር ሲያጋጥም ህጉ ችሎቱ ዝግ ይሁን ብሎ ስለሚደነግግ በዝግ መሆን አለበት ነው ያለው ፍርድ ቤቱ።

    ለችሎቱ ሂደት አስፈላጊ ናቸው የተባሉ አካላት ብቻ ሲቀሩ ጋዜጠኞችን ጨምሮ ሌሎች ታዳሚዎች ችሎቱን በቀጥታ እንዳይከታተሉ ተደርጓል።

    ነገር ግን ፍርድ ቤቱ አስፈላጊ የሆነውን ሂደት ብቻ ጋዜጠኞች እንዲያገኙ ባመቻቸው መንገድ መሰረት ተከሳሾች በተመደበላቸው የመንግስት ተከላካይ ጠበቃ አማካኝነት ያቀረቡት የክስ መቃወሚያ ውድቅ መደረጉን ለማወቅ ተችሏል።

    ተከሳሾቹ ክሱ ተነቦላቸው በሰጡት የእምነት ክህደት ቃል ወንጀሉን አልፈፀምንም ነው ያሉት።

    ክደው በመከራከራቸው የአቃቤ ህግ ምስክርን ለመስማት ፍርድ ቤቱ ለጥር 1፣ 2007 ዓ.ም ተለዋጭ ቀጠሮ ይዟል።