30 December 2014 Written by  FanaBC

የአራት አርቲስቶች ስራዎችን አስመስሎ በማዘጋጀት ለገበያ በማቅረብ የተከሰሰው ቃቂ ተስፋዬ በሶስት አመት ከሰባት ወር እስራት ተቀጣ

የአርቲስት አስቴር ከበደ፣ ነዋይ ደበበ፣ ሙሉ ገበየሁ እና ደበሽ ተመስገን ስራዎችን አስመስሎ በማዘጋጀት ለገበያ ያቀረበው ቃቂ ተስፋዬ በሶስት አመት ከሰባት ወር እስራት እንዲቀጣ ተወሰነበት።

የ24 አመቱ ቃቂ ተስፋዬ አቃቤ ህግ በአዋጅ ቁጥር 410/1996 የወጣውን የቅጅና ተዛማጅ መብቶችን ጥሷል በማለት ነው የከሰሰው።

ወንጀሉን የፈፀመው ደግሞ ከ2004 አ.ም ጀምሮ ነው።

በአርቲስት አስቴር ከበደ የተዘፈኑ አበባዬ ሆይ፣ ፍቅር ደስ ደስ፣ የኔ አካል ውድነህ፣ አካል ገላ ገላ፣ ፍቅር እንዳሰብኩት፣ ለጤና ያድርግልኝ፣ እንዲህ ነው ጉብል የሚሉ ስምንት ዘፈኖችን እርሷ በወንድ ፆታ የተጫወተችውን እሱ ደግሞ በሴት በመቀየር እና በማመሳሰል ዘፍኖ አሳትሞ ለገበያ ማቅረቡ ተረጋግጧል።

የራሱን ፎቶ ግራፍ እና የስልክ አድራሻውን የተለጠፈበት ሲዲ ለገበያ ቀርቦ እንደነበርና በእርሱ እና የአስቴር ከበደ ሲዲ በአንድ ወቅት ለገበያ በመቅረባቸው ሰው ግራ ተጋብቷል እወነቱ የቱ ነው የሚል ኢንተርቪው ከአንድ መገናኛ ብዙሀን ጋር አድርጎ በእርግጥም ወንጀሉም መፈፀሙን አምኖ የአቃቤ ህግ ምስክርም የዘፈን ሲዲውን ከሙዚቃ ቤት በ25 ብር መግዛቱን በምስክርነት እና በማስረጃነት ተቀብሎ ባለፈው ሳምንት የጥፋተኝነት ፍርድ ተላልፎበት እንደነበር የሚታወስ ነው።

ቃቂ ዛሬ በቅጣቱ ቀን ከመገናኛ ብዙሀን ጋር ያደረኩት ቃለ ምልልስ ሆን ተብሎ የተቀነባበረ ነው እና ስራዎቹ የኔ አይደሉም ብሎ ሀሳቡን አቅርቧል።

ምንም እንኳ ዛሬ ችሎቱ ክርክር የሚያደምጥበት ቀን ባይሆንም ሰምቶቷል።

ተከሳሹ ቅጣቱን ሊያቀሉለት የሚችሉ የቅጣት ማቅለያ  ምክንያቶች በፅሁፍ እንዲያቀርብ ተብሎ ነበር።

ነዋይ ደበበ፣ ሙሉ ገበየሁ እና ደበሽ ተመስገን ጋር የፈፀመው እርቅ በወረቀት ተደግፎ መጥቷል።

ፍርድ ቤቱ ከአስቴር ጋር ያደረገውን እርቅ ከአንድ የህትመት ሚዲያ የመጣለትን ተቀብሎታል።

አቃቤ ህግ የቅጣት ማክብጃ አላቀረበም ይልቁንም ወንጀሉ ወስብስብ እና ከባድ ባለመሆኑ ወንጀሉ በዝቅተኛ ደረጃ  ይያዝለት ብሎ ነበር፤ተከሳሹም ፍርድ ቤቱ ይለፈኝ ይህን ጥፋት ደግሜ አልፈፅምም ማለቱ ይታወቃል።

የተጠቀሰበት አንቀፅ ከአምስት አመት በሚበልጥ ከ10 አመት በሚያንስ የሚያሰቀጣ ነው።

ነገር ግን ችሎቱ የቅጣት ማቅለያዎችን ከግምት ውስጥ በማስገባት ሶስት አመት ከሰባት ወር ቀጥቶታል።

ነገር ግን ተከሳኙ መፀፀቱን፣ ፍርድ ቤቱ በይቅርታ ይለፈኝ ማለቱን፣ የመብት ጥሰት የተፈፀመባቸው አርቲስቶች ጋር እርቅ መፈፀሙን በመገንዘብ ቅጣቱን በሁለት አመት ገድቦለታል።

አምስት ሺህ ብር የዋስትና አንድ ሺህ ብር የክርክር ወጪ አስይዞ ይፈታ ብሎአል።