30 December 2014 Written by  FanaBC

መንግስትን 1 ቢሊየን ብር ባሳጡ የውጭ ዜጎችና ኢትዮዽያዊ ላይ አቃቤህግ ምላሽ እንዲሰጥ ታዘዘ

መንግስትን 1 ቢሊየን ብር የሚጠጋ ገንዘብ አጭበርብረዋል በሚል ክስ የተመሰረተባቸው የውጭ ዜጎችና አንድ ኢትዮጵያዊ ዛሬ የተመሰረተባቸውን ክስ ተከትሎ ባቀረቡት መቃወሚያ ላይ አቃቤህግ ምላሽ እንዲሰጥ ታዘዘ።

ክስ የተመሰረተባቸው 17 የውጭ ሃገር ዜጎች እና ድርጅቶች እንዲሁም አንድ ኢትዮዽያዊ  በህገ ወጥ ንግድ እና ከታክስ ስወራ ጋር በተያያዙ ወንጀሎች ነው የተከሰሱት።

አስረስ አወል አብዱ ከተሰኘው ተከሳሽ ውጭ ሌሎች የህንድ፣ ሲሪላንካ፣ ፓኪስታንና ስዊዘርላንድ ዜግነት ያላቸው ናቸው።

ከእነዚህ መካከል በክስ መዝገቡ 12ኛ እና 13ኛ ተራ ቁጥር ላይ የተጠቀሱ ዱባይ ኦቶ ጋለሪ እና ኦቶ ወርልድ ኢንተርናሽናል የተሰኙ ደርጅቶች የተከሰሱ ሲሆን፥ ባለቤቶቻቸውም እስካሁን ተፈልገው ሊገኙ አለመቻላቸው ታውቋል።

በጋዜጣ ተፈልገው ያልተገኙ የእነዚህ ደርጅቶች ጠበቃ ዛሬ በችሎቱ በመቅረቡ ተቃውሞ አስነሰቷል።

በጋዜጣ ተፈልገው ያልተገኙ ተከሳሾች እንዴት ሊወክሉ ይችላሉ ቢባልም የቀረበው ጠበቃ ጥብቅና እንዳልቆም የሚከለክለኝ የለም በማለቱ፥ ችሎቱ በክርክሩ ላይ ብይን ለመስጠት ለታሀሳስ 23፣ 2007 ተለዋጭ ቀጠሮ ይዟል።

ለኢትዮዽያውያን ብቻ በተፈቀደ የንግድ ዘርፍ ተሰማርተው ባጃጅ ታክሲዎችን በማከፋፈል እዚህ ወንጀል ውስጥ ተሰማርተዋል በሚል ተጠርጥረው ክስ የተመሰረተባቸው ግለሰቦች
በተለየያ ምክንያቶች ክሱ ሳይነበብላቸው ቆይቶ ገና ዛሬ ተነቦላቸዋል።

ቀደም ሲል ከጠበቆቻቸው ጋር እንዲማከሩ በተባለው መሰረት በደረሳቸው ክስ መቃወሚያቸውን በጽሁፍ ያቀረቡ ሲሆን፥ አቃቤህግም ምላሹን ለጥር 5፣ 2007 እንዲያቀርብ የፌደራሉ ከፍተኛ ፍርድ ቤት 3ኛ የወንጀል ችሎት አዟል።

በጋዜጣ ተፈልገው ያልተገኙ የውጭ ዜግነት ያላቸው ተከሳሾችም በሌሉበት ጉዳያቸው ይታይ ተብሏል።