17 December 2014 Written by  EthiopianReporter

የዓቃቤ ሕግ ምስክር ማስፈራሪያ እየደረሰባቸው መሆኑን ለፍርድ ቤት አመለከቱ

አራጣ በማበደር ተጠርጥረው ክስ የተመሠረተባቸውና እስከ 500 ሺሕ ብር በሚደርስ ዋስ ተፈትተው ክሳቸውን በመከታተል ላይ የሚገኙ ተጠርጣሪዎች፣ በዓቃቤ ሕግ ምስክር ላይ ዛቻና ማስፈራሪያ እያደረሱባቸው መሆኑን ክሱን እየመረመረው ለሚገኘው ፍርድ ቤት አመለከቱ፡፡ 

የፌዴራል ዓቃቤ ሕግ በአራጣ አበዳሪነት ወንጀል ተጠርጥረው ክስ በመሠረተባቸው በእነ ዳንኤል ግዛቸው በላይ የክስ መዝገብ ከተካተቱት ተጠርጣሪዎች ውስጥ፣ ቄስ ጌራወርቅ ወርቅነህ የተባሉ ተጠርጣሪ በዓቃቤ ሕግ ምስክር ላይ መዛታቸውን ምስክሯ ለችሎቱ ዳኛ አመልክተዋል፡፡ 

ዓቃቤ ሕግ በምስክርነት የቆጠራቸውና የግል ተበዳይ አቶ ፋሲል ዘውዴ (አራጣ ተበድረው ሊከፍሉ ባለመቻላቸው ከአገር ተሰደዋል) ባለቤት ወ/ሮ ማሚቱ አላምረው፣ ክሱን በመመርመር ላይ ለሚገኘው የፌዴራል ከፍተኛ ፍርድ ቤት 8ኛ ወንጀል ችሎት አቤቱታቸውን አሰምተዋል፡፡ 

ባለቤታቸው አቶ ፋሲል አገር ያወቃቸው ነጋዴ እንደነበሩ ያስታወሱት ወ/ሮ ማሚቱ፣ አሁን ግን ተጠርጣሪዎቹ አራጣ አበዳሪዎች የጣሉባቸውን የወለድ መጠን መክፈል ባለመቻላቸው ከአገር መሰደዳቸውን አስታውሰው፣ ዓቃቤ ሕግ በመሠረተው ክስ ላይ ምስክር ሆነው መቆጠራቸውን የሚያውቁት ተጠርጣሪዎች ‹‹በጥይት እንገልሻለን›› እስከማለት የደረሰ ማስፈራሪያ እየደረሱባቸው መሆኑን ተናግረዋል፡፡ 

የሦስት ልጆች እናት መሆናቸውን ለፍርድ ቤቱ ገልጸው፣ ‹‹ምስክርነቴን ሰጥቼ ብሞትም ግድ የለኝም፡፡ ልጆቼን መንግሥት ይረከበኛል፡፡ ምክንያቱም እንደሚገድሉኝ በአጭር የስልክ መልዕክትና በፊት ለፊት እየነገሩኝ ነው፤›› በማለት እንባ እየተናነቃቸው ለፍርድ ቤቱ አስረድተዋል፡፡ 

ተጠርጣሪዎቹ አደረሱብኝ የሚሉትን ዛቻ በሌላ ችሎት ክስ እንደመሠረቱና ከእነሱም ውስጥ የቄስ ጌራወርቅ ወርቅነህ ስለተመሰከረባቸው እንዲከላከሉ ብይን እንደተሰጠ ለፍርድ ቤቱ ያስረዱት ወ/ሮ ማሚቱ፣ ፍርድ ቤቱ እየደረሰባቸው ያለውን ማስፈራራትና ዛቻ እንዲያውቅላቸው ጠይቀዋል፡፡ ፍርድ ቤቱ ተጠርጣሪውን፣ ‹‹እንዲህ ማድረግ ለማንም አይጠቅምም፡፡ እርስዎ የሃይማኖት አባት እንደመሆንዎ መጠን ሊያስተምሩና ሌሎችን ሊመክሩ ሲገባ እንዲህ ማድረግ ተገቢ አይደለም፤›› በማለት ከድርጊታቸው እንዲቆጠቡ አሳስቧል፡፡ 

አቶ ዳንኤል ግዛቸው፣ አቶ ዳኝነት ሞላልኝ፣ አቶ ግዛቸው ወርቅነህ፣ ቄስ ጌራወርቅ ወርቅነህና አቶ ጌትነት ተሾመ የማይገባ ብልፅግና ለማግኘት በማሰብ የግል ተበዳይ ለሆኑትና በአሁኑ ጊዜ ተሰደው ለሚገኙት አቶ ፋሲል ዘውዴ፣ ባንክ ከሚያስከፍለው ወለድ በላይ በሚታሰብ ወለድ በተለያዩ ጊዜያት የተለያየ መጠን ያለው ገንዘብ በአራጣ በማበደር ወንጀል ተከሰው እንደቅደም ተከተላቸው በ500 ሺሕ ብር፣ በ400 ሺሕ ብር፣ በ200 ሺሕ ብር፣ በ400 ሺሕ ብር እና በ400 ሺሕ ብር ዋስ ተለቀው በውጭ ሆነው በመከራከር ላይ መሆናቸውን መዘገባችን ይታወሳል፡፡