03 December 2014 Written by  EthiopianReporter

የበጎ አድራጎት ድርጅቶች ኤጀንሲ የ30/70 መመርያን አሻሻለ

የሲቪል ማኅበራትና የበጎ አድራጎት ድርጅቶች ኤጀንሲ የሚቆጣጠራቸው ድርጅቶች፣ በአስተዳደራዊ ወጪዎች ሥር የነበሩ የተወሰኑ አገልግሎቶች የተወሰኑ በፕሮግራም በጀት እንዲካተቱ በማድረግ የ30/70 መመርያን አሻሻለ፡፡

ኤጀንሲው ይህንን ያደረገው የ30/70 መመርያ የተወሰነውን ክፍል በማሻሻል ሲሆን፣ ግብረ ሰናይ ድርጅቶች በኤጀንሲው መመርያ ማሻሻያ ሙሉ ለሙሉ ባይረኩም፣ በጎ ጅማሬ ብለውታል፡፡ ቀደም ሲል ኤጀንሲው በ30/70 መመርያ ግብረ ሰናይ ድርጅቶች፣ ለተወሰኑ የአገልግሎት ግዥዎች በመደበኛ (አስተዳደራዊ) ወጪዎች እንዲሸፈኑ አድርጎ ነበር፡፡ በዚህ ምክንያት በርካታ ግብረ ሰናይ ድርጅቶች ቅሬታ ከማቅረባቸው ባሻገር ጥናቶችን እያዘጋጁ መመርያው እንዲሻሻል ሲወተውቱ ቆይተዋል፡፡

ሰሞኑን የኤጀንሲው ሥራ አመራር ቦርድ ተሰብስቦ፣ የተወሰኑ አገልግሎት ግዥዎች በፕሮግራም በጀት ውስጥ እንዲካተቱ በማድረግ መመርያው ላይ ማሻሻያ አድርጓል፡፡ የመመርያው ማሻሻያ በተለይ የተሽከርካሪ ግዥዎች ለዕርዳታ የሚውሉ ቁሳቁሶችን ለማጓጓዝ የሚወጡ ወጪዎች፣ ለእነዚሁ ተግባራት የሚወጡ የነዳጅ ወጪዎች፣ ለአካባቢ ጥበቃ ችግኝ ለማፍላት የሚወጡ ወጪዎች፣ የአማካሪ ድርጅቶችን ለመቅጠር የሚወጡ ወጪዎችና ለሥልጠና የሚወጡ ወጪዎች በሙሉ ከአስተዳደራዊ በጀት ውጪ ሆነው፣ በፕሮግራም በጀት ውስጥ እንዲካተቱ አድርጓል፡፡

የክርስቲያን ተራድኦ ልማት ማኅበራት (ሲሲአርዲኤ) ዋና ዳይሬክተር ዶ/ር መሸሻ ሸዋረጋ ኤጀንሲው የወሰደውን የመመርያ ማሻሻያ በጎ ጅማሬ ነው ካሉ በኋላ፣ በመመርያው ውስጥ በቀጣይነት መሻሻል አለባቸው ያሏቸውን ነጥቦች ዘርዝረዋል፡፡ ዶ/ር መሸሻ መሻሻል አለባቸው ካሏቸው መካከል ለቢሮ ግንባታና ኪራይ፣ ለኮሙዩኒኬሽን፣ ውሎ አበል፣ ለክትትልና ግምገማ ተግባራት የሚወጡ ወጪዎች ተጠቃሾች ናቸው፡፡ እነዚህ ወጪዎች ከአስተዳደራዊ ወጥተው በፕሮግራም በጀት ውስጥ እንዲካተቱ ከኤጀንሲው ጋር ቀጣይ ድርድር እንደሚካሄድባቸው ዶ/ር መሸሻ አስታውቀዋል፡፡ 

በኢትዮጵያ በአሁኑ ወቅት እየተንቀሳቀሱ የሚገኙት ሲቪል ማኅበራትና የበጎ አድራጎት ድርጅቶች ከ3,100 በላይ ሲሆኑ፣ ኤጀንሲው የመቆጣጠር ሥልጣን በሕግ ተሰጥቶታል፡፡ አዋጁ ትኩረት ሰጥቶ ጠንከር ያለ ዕርምጃ ከወሰደባቸው ነጥቦች መካከል የድርጅቶቹን ፋይናንስ ሁኔታ መቆጣጠር አንዱ ነው፡፡

ድርጅቶቹ በጥቅሉ በአማካይ አንድ ቢሊዮን ዶላር ከውጭ አገር ወደ ኢትዮጵያ በማስገባት የተለያዩ ተግባራትን ያከናውናሉ፡፡ ድርጅቶቹ የሚያስገቡትን ፋይናንስ ለመቆጣጠር ብሎም ፖለቲካዊ እንቅስቃሴዎች በአገር ውስጥ ፋይናንስ እንዲከናወኑ ለማድረግ የ30/70 እና የ10/90 ቀመር ተግባራዊ አድርጓል፡፡ 

የኤጀንሲው የሕዝብ ግንኙነት ኃላፊ አቶ አሰፋ ተስፋዬ፣ ማሻሻያው በአዋጁ ለልማትና ለተጠቃሚ የሚውሉ በጀቶች በፕሮግራም በጀትነት እንዲካተቱ በተቀመጠው መሠረት፣ ድርጅቶች በአስተዳደራዊ ወጪነት የተያዙ ጉዳዮች ለልማትና ለተጠቃሚ የሚውሉ ናቸው በማለት ባቀረቡት ቅሬታ መሠረት በቦርድ መፅደቁን ለሪፖርተር ገልጸዋል፡፡

የሲቪል ማኅበራትና የበጎ አድራጎት ድርጅቶች አዋጅ ኢትዮጵያ በተለይ በሰብዓዊ መብት ዙሪያ ከሚሠሩ ተቋማትና ከምዕራባውያን መሠረታዊ ማሻሻያ እንዲደረግባቸው ከሚጠይቁ ሕጎች አንዱ ነው፡፡