03 December 2014 Written by  EthiopianReporter

ኢትዮጵያና ሱዳን ወንጀልን በጋራ ለመመርመር የፈረሙት ስምምነት ፀደቀ

የኢትዮጵያና የሱዳን መንግሥታት እ.ኤ.አ. በ2013 ወንጀልን በጋራ ለመመርመር የፈረሙትን ስምምነት የሕዝብ ተወካዮች ምክር ቤት በትላንትናው ዕለት አፀደቀው፡፡ 

ስምምነቱን የመረመረው የምክር ቤቱ የሕግ ፍትሕና አስተዳደር ጉዳዮች ቋሚ ኮሚቴ ለፓርላማው ባቀረበው የውሳኔ ሐሳብ ስምምነቱ ላይ ያካሄደው ማስተካከያ አንድ ብቻ ሲሆን፣ ይህም ስምምነቱ የተፈረመበት ቀን ተሳስቶ የተጻፈ በመሆኑ ይስተካከል የሚል ነው፡፡ 

ባቀረበውም የውሳኔ ሐሳብ ስምምነቱ የሁለቱ አገሮችን ዲፕሎማሲያዊና ኢኮኖሚያዊ ግንኙነት ለማጠናከር ከማስቻሉም በተጨማሪ ሁለቱ አገሮች በድንበር ዘለል የወንጀል ፍትሕ አስተዳደር በጋራና በቅንጅት የሚሠሩበትን ማዕቀፍ የሚያመቻች ነው ብሎታል፡፡ 

ስምምነቱ 26 አንቀጾች ያሉት ሲሆን፣ ከእነዚህም መካከል አንዱ ወንጀል የፈጸመ የአንድ አገር ዜጋ ወይም ሕጋዊ ሰውነት ያለው አካል በሌላኛው አገር እንደሚኖር ከተጠረጠረ በጠያቂው አገር ጥያቄ አቅራቢነት የምርመራ ሥራውን ማገዝ ይገኝበታል፡፡ 

በዚህም መሠረት የፍርድ ሰነዶችን ለመለዋወጥ፣ ብርበራ ለማድረግና ለመያዝ፣ መረጃዎችንና ለማስረጃነት የሚያገለግሉ ዕቃዎችን ለመለዋወጥ፣ ዋናና የተረጋገጡ ቅጂ የባንክ፣ የገንዘብ፣ የድርጅትና የንግድ ሰነዶችን መለዋወጥ የስምምነቱ አካል ነው፡፡ 

የተጠርጣሪ ግለሰቦችን ግንኙነት መጥለፍ፣ በወንጀል ሒደት ውስጥ ሠርጎ በመግባት መረጃዎችን የማሰባሰብ ኃላፊነትም በስምምነቱ ተካቷል፡፡