01 December 2014 Written by  EthiopianReporter

መከላከያ ሠራዊትን በመሰለልና መረጃ በማስተላለፍ የተጠረጠሩ ኢትዮጵያውያንና ኤርትራውያን ተከሰሱ

ከኤርትራ መንግሥት የመረጃ ሠራተኞች ጋር ሚስጥራዊ ግንኙነት በመፍጠር፣ ከጥቅምት ወር 2004 ዓ.ም. ጀምሮ እስከ ግንቦት ወር 2006 ዓ.ም. ድረስ፣ በኢትዮጵያ ድንበር ላይ ስለሚገኘው፤ የኢትዮጵያ መከላከያ ሠራዊት ወቅታዊ ሁኔታ በመሰለልና መረጃ በመስጠት የተጠረጠሩ ዘጠኝ ኢትዮጵያውያንና ኤርትራውያን ክስ ተመሠረተባቸው፡፡

ዓቃቤ ሕግ፣ በፌዴራል ከፍተኛ ፍርድ ቤት 19ኛ ወንጀል ችሎት ክስ የመሠረተባቸው ኢትዮጵያውያን ከሀሠ መስፍን ፈንታ፣ ፍስሃዬ ተክለ ገብረሥላሴ፣ ጐይቶም ይህደጐ፣ ጐበዛይ ገብረሥላሴ፣ ገብረሚካኤል ገብረ ማርያም፣ ብርሃኔ ምራጭና ትኩዕ ንጉሠ ሲሆኑ፣ ኤርትራውያኖቹ ደግሞ፣ አብደላ ኢብራሂምና ልዑል መሐሪ ይባላሉ፡፡

በትግራይ ክልል ማዕከላዊ ዞን ወረዳ አህፍሮ ነዋሪ የሆነው ከሀሠ መስፍን የተባለው ተጠርጣሪ፣ ከጥቅምት ወር 2004 ዓ.ም. ጀምሮ፣ ዐዲዳዕሮና ገርሁ ሠርናይ በሚባሉ አካባቢዎች፣ ገብረ ዮሐንስ ከሚባል ኤርትራዊ የመረጃ ሠራተኛ ጋር በመገናኘት ከትግራይ ክልል ወደ ኤርትራ ገንዘብ (ናቅፋ) ሲያደርስ እንደነበር የዓቃቤ ሕግ ክስ ያስረዳል፡፡ 

የኤርትራ ወታደሮች፣ ስለኢትዮጵያ መከላከያ ሠራዊት ሁኔታ በመሰለል መረጃ እንዲያቀርብላቸው ሲያነጋግሩት በመስማማት፣ ሸሀቅ አካባቢ ስለሚገኘው የመከላከያ ሠራዊት መረጃ በማቀበሉ 250 ብር እንደተከፈለውም ክሱ ያስረዳል፡፡ ተጠርጣሪው በተለያዩ ጊዜያት ስለኢትዮጵያ መከላከያ ሠራዊት ሁኔታ፣ መረጃ በስልክና በአካል በማስተላለፍ እስከ 3,000 ብር የሚደርስ ገንዘብ በተለያዩ ጊዜያት መቀበሉን ክሱ ይገልጻል፡፡

ኤርትራዊው አብደላ ኢብራሂምም፣ ኤርትራ ውስጥ በምትገኝ እህቱ አማካይነት ስልክ ተደውሎለት፣ ተክለ ብርሃን ከሚባል ኤርትራዊ ጋር እንዲተዋወቅ በማድረግ፣ በኢትዮጵያ ስለሚገኙት የኤርትራ ተቃዋሚዎች የት እንደሚገኙ መረጃ መስጠቱን ክሱ ይገልጻል፡፡

ሽመልባ ካምፕ ውስጥ ያሉ የኤርትራ ተቃዋሚዎች ድርጅት ውስጥ ያሉ አባላት፣ ስለሚያደርጉት እንቅስቃሴና የሳሆ ድርጅት ሁኔታን በሚመለከት መረጃ እያጠናከረ መላኩንና ክፍያም እንደተፈጸመለት ክሱ ይጠቁማል፡፡ 

ተጠርጣሪው ስለ ኤርትራ ተቃዋሚዎች ድርጅት ዝርዝር መረጃ፣ ስላለው፣ የሰው ኃይል ብዛት፣ በኤርትራ ድንበር አካባቢ ስላለው እንቅስቃሴ፣ ክፍሎም (ሚስጥር ስሙ ተክለ ብርሃን) ለተባለ የሻዕቢያ መረጃ ኦፊሰር መረጃ ማስተላለፉም በክሱ ተገልጿል፡፡ 

ልዑል መሀሪ የተባለው ኤርትራዊ ተጠርጣሪም፣ በታህሳስ ወር 2003 ዓ.ም. ወደ ኢትዮጵያ በመግባትና በትግራይ ክልል በሚገኘው የኤርትራውያን ስደተኞች ካምፕ ውስጥ ገብቶ ከኖረ በኋላ፣ የሳሆ ብሔራዊ ዲሞክራሲያዊ ግንባር አመራሮች ወቅታዊ ፍላጐት ምን እንደሆነ እያጠና፣ ገብረ ዮሐንስ ለተባለው ኤርትራዊ የመረጃ ኦፊሰር፣ መረጃ ሲያስተላልፍ እንደነበር ክሱ ይገልጻል፡፡ በሳዑዲ ዓረቢያ ላሉም ኤርትራውያን በስልክ መረጃ ያስተላልፍ እንደነበር ክሱ ይገልጻል፡፡

ሌሎቹም ተጠርጣሪዎች ለኤርትራ የመንግሥት የደኅንነት ሠራተኞች፣ በትግራይ ክልል በሚገኘው መዛብር ድንበርና በአካባቢው ያሉ የኤርትራ ተቃዋሚ ታጣቂዎች፣ ከቦታ ቦታ መዘዋወር፣ ኢንጪት አካባቢ ስለሚገኘው የኢትዮጵያ መከላከያ ሠራዊት እንቅስቃሴና ብዛት፣ ኢትዮጵያ ውስጥ ስለሚሠሩ የልማት እንቅስቃሴዎች፣ መሠረተ ልማቶች፣ በሰሜን በኩል በመገንባት ላይ ስላሉ መንገዶች፣ ከባድ የጦር ምድብተኛ ኃይል የት እንደሚገኝና ሌሎችም በርካታ መረጃዎችን በመሰለል ለሻዕቢያ ሰዎች መረጃ ማስተላለፋቸው በክሱ ተገልጿል፡፡ 

በኢትዮጵያ መከላከያ ሠራዊትና በትግራይ ክልል፣ በካምፕ ስለሚኖሩ ኤርትራውያን ስደተኞች ሁኔታ በመሰለል፣ በክፍያ ሲያስተላልፉ እንደነበር የተገለጸው ዘጠኙም ተጠርጣሪዎች ላይ፣ የስለላ ወንጀል ክስ የተመሠረተባቸው በመሆኑ ዋስትና ተከልክለው በማረሚያ ቤት በመሆን ክሳቸውን እንዲከታተሉ ፍርድ ቤት አዟል፡፡ 

ብርሃኔ ምራጭ የተባለው ተጠርጣሪ ፈቃድ ሳይኖረው ለሕግ ተቃራኒ በሆነ መንገድ፣ የክላሽንኮቭ ጠመንጃ ጥይቶችን በመግዛትና በመሸጥ፣ እንዲሁም ‹‹ኤፍዋን ቦንብ ገዝቶ አስቀምጧል›› በሚል የጦር መሣሪያ በመነገድ ወንጀል ሁለተኛ ክስ ተመሥርቶበታል፡፡ ሁሉም ተጠርጣሪዎች አማርኛ ቋንቋ የማይናገሩ በመሆናቸው ፍርድ ቤቱ አስተርጓሚ መድቦላቸዋል፡፡ 

ተጠርጣሪዎቹ የዋስትና ጥያቄ አቅርበው ፍርድ ቤቱ ኅዳር 19 ቀን 2007 ዓ.ም. ውድቅ አድርጐባቸዋል፡፡