24 November 2014 Written by  EthiopianReporter

የቅጅና ተዛማጅ መብቶች ማሻሻያ አዋጅ ፀደቀ

ለሥነ ጽሑፍ፣ ለኪነ ጥበብና፣ ለፎቶግራፍ ሥራዎች ጥበቃ በሚያደርገው የቅጅና ተዛማጅ መብቶች አዋጅ ቁጥር 410/96 ላይ የተደረገውን ማሻሻያ ፓርላማው አፀደቀው፡፡ 

ማሻሻያው ለንግድ ዓላማ የታተመ የድምፅ ሪከርዲንግ እንደ ካፍቴሪያዎች፣ መዝናኛ ቦታዎች ባሉ ሕዝብ በተሰበሰበባቸው ቦታዎች ከቀረበ ወይም እንደ ምሽት ክበቦች ባሉ ቦታዎች በይፋ ከተከወነ ወይም ደግሞ በቴሌቪዥን፣ በሬዲዮ፣ በተለያዩ ድረ ገጾችና በመሳሰሉት መንገዶች ከቀረበ ተጠቃሚው ለሥራው ባለመብት ሮያሊቲ ክፍያ እንዲከፈል የሚደነግግ ነው፡፡ 

በውጭ አገሮች ጥበቃ የሚደረግላቸው ተመሳሳይ ሥራዎች ለአብነት ያህል የውጭ ሙዚቃዎችን የሚያጫውቱ ሬዲዮ ወይም ቴሌቪዥን ጣቢያዎች ሮያሊቲ ክፍያውን የመክፈል ግዴታ እንዳለባቸውም ማሻሻያው ይደነግጋል፡፡ በተመሳሳይ በውጭ ሥራዎቻቸው የቀረቡ ባለመብቶች ክፍያውን የሚያገኙበት አሠራር ይኖራል፡፡ 

ይህንን የሮያሊቲ ክፍያ ምጣኔውን የማርቀቅና ለአዕምሯዊ ጽሕፈት ቤት የማፀደቅ ኃላፊነት የተሰጠው፣ ጥበቃ የሚደረግላቸው የሥራ ውጤቶች ማኅበራት ለሚመሠርቱት የጋራ አስተዳደር ማኅበር ነው፡፡

ማኅበራትን የመመዝገብ ኃላፊነት የተጣለበት የበጐ አድራጐትና ማኅበራት ኤጀንሲ ቢሆንም፣ ይህ የጋራ አስተዳደር ማኅበር ራሱ በሚያወጣው መተዳደሪያ ደንብ መሠረት እንዲቋቁም ማሻሻያው ፈቅዷል፡፡ 

ሥራ ላይ የሚገኘው አዋጅ የቅጅና ተዛማጅ መብቶችን የተመለከቱ አለመግባባቶች ወይም ቅሬታዎች የሚፈቱት ሥልጣን በተሰጠው ፍርድ ቤት ብቻ እንዲሆን ይደነግግ ነበር፡፡ ማሻሻያው ግን የቅጅና ተዛማጅ መብቶች ላይ የሚፈጸም ጥሰት ውስብስብነት የሚታይበት በመሆኑ፣ በአዕምሯዊ ንብረት ጽሕፈት ቤት ሥር በሚቋቋም ትሪቡናል ውስጥ በመጀመሪያ እንዲታይ ደንግጓል፡፡ በትሪቡናሉ ውሳኔ ያልተስማማ በመደበኛ ፍርድ ቤት ይግባኝ ማለት እንደሚችል በማሻሻያው ተካቷል፡፡ 

የፓርላማው የሳይንስና ቴክኖሎጂ ጉዳዮች ቋሚ ኮሚቴ ረቂቅ ማሻሻያውን በዝርዝር በተመለከተበት ወቅት የመብቱ ተጠቃሚ የሆኑ ባለሙያዎች የመሠረቷቸው 11 ማኅበራት የሥራ ኃላፊዎች በምክር ቤቱ ተገኝተው የአዋጁን መውጣት ሲደግፉ እንደነበር ከምክር ቤቱ ያገኘነው መረጃ ያስረዳል፡፡