28 October 2014 Written by  EthiopianReporter

ኢትዮጵያና ሱዳን የወንጀል ማስረጃዎችን ለመለዋወጥ ያደረጉት ስምምነት ሊፀድቅ ነው

ጠቅላይ ሚኒስትር ኃይለ ማርያም ደሳለኝና የሱዳን ፕሬዚዳንት ኦማር ሐሰን አል በሽር በሱዳን ካርቱም ባለፈው ዓመት ታኅሳስ ወር ላይ የተፈራረሙት የወንጀል ጉዳዮች የጋራ ትብብር ስምምነት፣ ባለፈው ሐሙስ ለሕዝብ ተወካዮች ምክር ቤት ቀረበ፡፡ 

ስምምነቱ 26 አንቀጾችን የያዘ ሲሆን፣ ወንጀል የፈጸመ የአንድ አገር ዜጋ ወይም ሕጋዊ ሰውነት ያለው አካል በሌላኛው አገር እንደሚኖር ከተጠረጠረ፣ በጠያቂው አገር ጥያቄ አቅራቢነት የምርመራ ሥራውን የማገዝ ኃላፊነት ለመውሰድ ተስማምተዋል፡፡ 

በዚህም መሠረት የፍርድ ሰነዶችን ለመለዋወጥ፣ ብርበራ ለማድረግና ለመያዝ፣ መረጃዎችንና ለማስረጃነት የሚያገለግሉ ዕቃዎችን ለመስጠት፣ ዋናና የተረጋገጡ ቅጂ የባንክ፣ የገንዘብ፣ የድርጅትና የንግድ ሰነዶችን ለመለዋወጥ ተስማምተዋል፡፡ 

በጠያቂው አገር ጥያቄ አቅራቢነት የተያዙ ሰዎች ወይም ምስክሮች ለትብብር ጠያቂው አገር የፍርድ አካላት የምስክር ቃላቸውን እንዲሰጡ የማድረግ፣ የወንጀል ፍሬዎችን በመለየት የሚያዙበት፣ የሚታገዱበትና የሚወረሱበት ሁኔታን ማመቻቸት፣ የተጠርጣሪ ግለሰቦችን ግንኙነት መጥለፍ፣ በወንጀል ሒደት ውስጥ ሠርጎ በመግባት መረጃዎችን የማሰባሰብና በጊዜያዊነት ለወንጀል ምርመራ ሥራ የተያዙ ተጠርጣሪዎችን አሳልፎ የመስጠት ትብብርን ስምምነቱ ያጠቃልላል፡፡ 

የዚህ ስምምነት ማፅደቂያ አዋጅ ባለፈው ሐሙስ ለሕዝብ ተወካዮች ምክር ቤት ሲቀርብ፣ ስምምነቱ ለኢትዮጵያ የሚኖረው ፋይዳ አብሮ በአባሪነት ቀርቧል፡፡ ከባድ ወንጀል ፈጽመው በሱዳን ተሸሽገው የሚገኙ ወንጀለኞች በሱዳን የወንጀል ተግባራቸውን ከሚደግፉ ተቋማት ወይም ግለሰቦች ጋር ቀጣይ የወንጀል ተግባር ለመፈጸም እንዳይሰናዱ እንደሚያግዝ ተገልጿል፡፡ 

በአገሮቹ መካከል እየተፈጸሙ ያሉ ድንበር ዘለል ወንጀሎች በተለይም የሃይማኖት አክራሪነትና ለሽብር ጥቃት ያለው ተጋላጭነት፣ ሽብርተኝነትን በገንዘብ የመደገፍ፣ በወንጀል የተገኘ ገንዘብን ሕጋዊ አስመስሎ የማቅረብ፣ የኮንትሮባንድ ንግድን፣ ሕገወጥ የሰዎችና የአደንዛዥ ዕፅ ዝውውር ላይ የሚሳተፉ ወንጀለኞችን ለፍርድ ለማቅረብ ጠቀሜታ እንዳለው ማብራሪያው ያስረዳል፡፡ 

በተጨማሪም በርካታ የሱዳን ባለሀብቶች በኢትዮጵያ መዋዕለ ንዋያቸውን በማፍሰስ በተለያዩ የኢንቨስትመንት ሥራዎችን እያከናወኑ በመሆኑ፣ በዚህ መስክ ያለውን የወንጀል ተጋላጭነት ለመግታት እንደሚያስችል ተብራርቷል፡፡ ፓርላማው በስምምነቱ ላይ ከተወያየ በኋላ ለተጨማሪ እይታ ለሚመለከተው የሕግ፣ የፍትሕና የአስተዳደር ጉዳዮች ቋሚ ኮሚቴ መርቶታል፡፡